މާދަމާއަކީ މިއަހަރުގެ ފިތުރު އީދު ދުވަހެވެ. 1 މަސް ދުވަހގެ ދިގު ރޯދައިގެ އަޅުކަމަށްފަހު މުސްލިމުން އުފާފާޅުކުރާ ދުވަހެވެ. މި ބްލޮގްގެ ފަރާތުން ހުރިހައި ދިވެހި މުސްލިމް އަހުންނާއި އުހްތުންނަށް ފިތުރު އީދުގެ ތަހުނިޔާ ކިޔަމެވެ.
މިފަހަރުގެ އީދު އަހަރެމެންނާ ބައްދަލް މިކުރީ ދިވެހިންނަށް އައި ތާރީހީ ފައްތަރެއްގެ ތެރެއިންނެވެ. މިދުވަސްވަރު ފޯރިއާއެކު މުޅި ގައުމުގައި ހިނގަމުންދަނީ ރިޔާސީ ކެމްޕެއިންނެވެ. ތާއިދު ހޯދުމުގެ މަސައްކަތްތަކެވެ. ށ އަތޮޅުވެސް މިކަމުގައި އިސްތިސްނާ ވެގެނެއް ނުވެއެވެ. އެކިއެކި ކެންޑިޑޭޓުން އަތޮޅުގެ އެކި އެކި ރަށްރަށަށް ޒިޔާރަތް ކުރަމުން ރައްޔިތުންނާ ބައްދަލް ކުރަމުން، ރައްޔިތުންގެ ހާލުބަލާ އެމީހުންގެ އަޑު އަހަމުން އަދި އެކިއެކި ވައުދު ވަމުން ދާތީ އެބަ ފެނެއެވެ. ވަރަށް ފޯރީގައެވެ. މިއަތޮޅަށް ޒިޔާރަތް ކުރެއްވި ކެންޑިޑޭޓުންގެ ތެރޭގައި އިބްރާހިމް އިސްމާއިލް، އުމަރު ނަސީރު، ހަސަން ސައީދު ބުރުމާ ގާސިމް އަދި މުހައްމަދު ނަޝީދު (އަންނި) ހިމެނެއެވެ. ހަބަރުތައް ލިބެމުންދާ ގޮތުގައި ގާސިމް އިބަރާހިމްގެ ށ ދަތުރު އަދި މުޅިން ނުނިމެއެވެ. މި އީދުގެ ތެރޭގައި ބައެއް ރަށްރަށަށް ވަޑައިގަތުން އެބަ އޮތެވެ. އެހެން ނަމަވެސް މައުމޫން އަބްދުލް ގައްޔޫމް އަތޮޅަށް ދަތުރު ކުރެއްވުމުގެ ހަބަރެއް އަދި ލިބިފައެއް ނެތެވެ.
ތާއިދު ހޯދުމުގެ މަސައްކަތް މިހާ ފޯރިގަދައިރު، މިފަހަރު ކާމިޔަބު ކުރާނެ ކެންޑިޑޭޓަކާ މެދު އެކި މީހުންގެ ހިޔާލު ތަފާތެވެ. ކޮންމެ މީހަކުވެސް ބުނަމުންދަނީ އެމީހަކު ތާއިދުކުރާ ކެންޑިޑޭޓް ކަމިޔާބު ކުރާނެ ކަމަށެވެ. މި އިންތިހާބާ ގުޅޭ ހިޔަލު ހޯދުމުގެ ބައެއް ވޯޓުލުންތައް ވެސް ހިނގަމުން އެބަ ދެއެވެ. ބައެއް އިންޓަނެޓް ސައިޓްތަކުގައި ޕޯލްތައް ހިމަނާފައި ވެއެވެ. އަދި އެކި ޕޯލުގެ ނަތީޖާ ތަފާތެވެ. އަތޮޅުގެ ރަށްރަށުގެ ނަމުގައި ހަދާފައިވާ ބައެއް ބްލޮގްތަކުގެ ޕޯލްއަށް ބަލައިލާއިރު ކަނޑިތީމުލައިވް ގައި ކުރީގައި އުޅެނީ އެމްޑީޕީގެ ކެންޑިޑޭޓް މުހައްމަދު ނަޝީދު (އަންނި) އެވެ. ފެކްޓްކަނޑިތީމު ގެ ޕޯލުން އާދަޔާހިލާފު ކުރިއެރުމެއް ހޯދާފައިވަނީ އަމިއްލަގޮތުން ކުރިމަތި ލައްވާފައިވާ ކެންޑިޑޭޓް ހަސަން ސައީދެވެ. އަދި ގޮއިދޫ ނިއުސް ގެ ޕޯލުން ކުރީގައި އުޅެނީވެސް ހަސަން އެވެ. މީގެ އިތުރުން މުޅި ރާއްޖެއަށް ހުޅުވާލައިގެން އެފްއެމް ރޭޑިއޯތަކުން ދަނީ ހިޔަލުހޯދުމުގެ ވޯޓް ނަގަމުންނެވެ. އެޓޯލް ރޭޑިޔޯގެ ވޯޓުގައި ކުރި ހޯދީ އެމްޑީޕީގެ ކެންޑިޑޭޓް މުހައްމަދު ނަޝީދު (އަންނި) އެވެ. އަދި ދިއެފްއެމް ގެ ވޭތުވެދިޔަ 3 ހަފްތާގެ ވޯޓުގެ ކުރި ހޯދާފައިވަނީވެސް ހަމަ މުހައްމަދު ނަޝީދެވެ. މި ވޯޓުގައި ވޭތުވެ ދިޔަ 2 ހަފްތާގައި ވެސް 2 ވަނަ ހޯދީ ހަސަން ސައީދެވެ. ފުރަތަމަ ހަފްތާގައި 2 ވަނަގައި އޮތް މައުމޫން އަބްދުލް ގައްޔޫމު މިހާރު ވަނީ 3 ވަނައަށް ވެއްޓިފައެވެ.
މިފަހަރުގެ އީދާ ގުޅިގެން މިއަންނަ ރިޔާސީ އިންތިހާބުގެ ނަތީޖާ އިއުލާނު ކުރާ ދުވަސް ވެސް ވެގެން ދަނީ އަނެއްކާ އަނެއް އީދަށެވެ. ކޮންމެ ކެންޑިޑޭޓަކު ހޮވުނަސް އެ ހޮވުނު ކެނޑިޑޭޓެއްގެ ސަޕޯޓަރުންނަށް ޖެހިޖެހިގެން ކައިރިކައިރީގައި 2 އީދު އައީއެވެ. ދެއުފާ އެއްފަހަރާ ލިބުނީ އެވެ.
އީދެއް މިއަންނަނީ އިތުރު ހިތްވަރެއްގެ ފަހަތުންނެވެ. ރޯދައިގެ ފަހަތުން ފިތުރު އީދު އަދި ހައްޖުގެ ފަހަތުން އަލްހާއީދެވެ. ހަމަ މިއުސޫލުން މިފަހަރުގެ ކެމްޕެއިނަށް ފަހު ރިޔާސީ އީދެވެ. އެހެންވީމާ އީދު ގުޅިފައި މިއޮންނަނީ އިތުރު ހިތްވަރާ ބުރައާއެވެ. މިހާރު މިކުރިޔަށް ދަނީ އެ ބުރަ މަސައްކަތެވެ. އެ ހިތްވަރާ ޖޯޝާއެކު އެވެ. މިކަމުގައިވެސް ގިނަ މަސައްކަތް ގަދަ ހިތްވަރާއެކު ކުރެވުނު ބަޔަކަށް އީދު ބައްދަލް ކުރާނއެވެ. ކާމިޔާބު ވާނެއެވެ.
