ޚަބަރު: ހަވީރު
ށ. ނޫމަރާގެ އިނޖީނުގޭގެ ހިސާބުތައް އޯޑިޓްކޮށް ނުދީގެން ޒުވާނުންގެ ތެރެއިން ބަޔަކު ނުކުމެ މިދިޔަ ހޯމަ ދުވަހު ރަށު އޮފީސް ހިސޯރުކޮށްފިއެވެ.
އެރަށު އޮފީސް ހިންގެވުމާ ހަވާލުވެ ހުންނެވި ކަތީބު އަލީ ރަޝީދު ހަސަން މިއަދު ވިދާޅުވީ ހޯމަ ދުވަހުން ފެށިގެން ޒުވާނުންގެ ބަޔަކު އޮފީސް ބަންދުކުރިޔަ ނުދީ އޮފީސްތެރޭގައި އެބަ ތިބި ކަމަށެވެ.
"އެމީހުން އެދުނީ ރައްޔިތުންގެ ފައިސާ ހަރަދު ކުރިގޮތުގެ ތަފްސީލް ދެއްކުމަށް. އެއީ ރައްޔިތުންނަށް އެނގެން ޖެހޭނެ އެއްޗަކަށް ވާތީ އެ ތަފްސީލްތައް އަޅުގަނޑުމެން ވަނީ އެމީހުންނަށް ދައްކައިފަ. އެހެން ނަމަވެސް އޮފީސް ދޫކޮށް އެމީހުނެއް ނުދޭ. އެމީހުން ތިއްބާ އޮފީސް ބަންދެއް ނުކުރެވޭނެތާ." ކަތީބު ވިދާޅުވިއެވެ.
އޮފީސް ހިސޯރުކޮށްގެން އޮފީސްތެރޭގައި ތިބި މީހުންގެ ތެރެއިން އެކަކު މިއަދު ފޯނުން ބުނި ގޮތުގައި ރައްޔިތުނަގެ އިންޖީނުގޭގެ ހިސާބުތައް އޮޑިޓްކޮށްދޭނެ ރަސްމީ ފަރާތެއް ހޯދައި ދިނުމަށް ރަށު އޮފީހާއި އަތޮޅު އޮފީހުގައި ވަނީ އެދިފައެވެ. އޮފީސް ދޫކޮށްދެވެން އޮތީ އިންޖީނުގޭގެ ހިސާބުތައް ބެލުމުން ކަމަށްވެސް އޭނާ ބުންޏެވެ.
އޭނާ ބުނިގޮތުގައި ޒުވާނުންގެ ތެރެއިން ބަޔަކު ރަށު އޮފީސްތެރޭގައި ތިބީ އެރަށު އިންޖީނުގެއަށް ކޮންމެ މަހަކު 10000ރ. ގެ ގެއްލުން ވާކަމަށް ރަށު އޮފީހުން ބުނަމުން ދާތީ އެ ހިސަބުތައް ޗެކްކުރުމަށެވެ.
"އަޅުގަނޑުމެން ހަތަރު މީހުންނާއި ރކ. ކޮމިޓީގެ ދެ މެމްބަރުންނާއި އިންޖީނުގެއާއި ރަށު އޮފީހުގެ މީހެއް ވެގެން އިންޖީނުގެ އޯޑިޓް ކުރާތާ މިވީ ތިން ދުވަސް. ނުކައި ނުބޮއެ ހޭލާ ތިބެގެން އަޅުގަނޑުމެން ބެލިއިރު މިދިޔަ އަހަރުގެ ފަހު ހަމަސް ދުވަހުގެ ތެރޭގައި ވެސް އިންޖީނުގެއަށް ފައިދާގެ ގޮތުގައި 90800ރ. ލިބިފައިވޭ. އިންޖީނު ގެއަށް ގެއްލުންވާ ތަނެއް އެ ހިސަބުތަކަކުން ނުދައްކާ." އޭނާ ބުންޏެވެ. "އެކަމަކު ރަށު އޮފީހުން ބުނަމުން ދަނީ އިންޖީނުގޭގެ ހަރަދުތަކަށް ކޮންމެ މަހަކުނ10000ރ. ގެ ގެއްލުން ވަމުން އަންނަކަމަށް. އެކަމަކު އެ ގެއްލުން ފޫބައްދާކަށް ރައްޔިތުންގެ އެކައުންޓުން ވެސް ފައިސާއެއް ނުނަގާ." އޭނާ ބުންޏެވެ.
އޮފީސްތެރޭގައި ތިބި ޒުވާނުން ބުނީ އެ މައްސަލަ ހައްލު ކުރުމަށް ރައްޔިތުންގެ އިންޖީނުގޭގެ ހިސާބުތައް އޯޑިޓް ކޮށްދޭން ބަޔަކު ހޯދައިދިނުމަށް ރަށު އޮފީހާއި އަތޮޅު އޮފީހުގައި މިހާރު ވަނީ އެދިފައެވެ.
"ރަސްމީ ފަރާތަކުން އައިސް އޯޑިޓް ނުކުރަނީހެއް އަޅުގަނޑުމެން މިތަނަކުން ނުދާނަން. ގެއްލުންވާ ކަމަށް އެބުނާ ފައިސާތަކަށް ވީގޮތް ބަލަން އަޅުގަނޑުމެން ބޭނުންވޭ." އެރަށު ޒުވާނަކު ބުންޏެވެ.
